lipu+nimi pi+toki+pona taso
a
ona li pona a! ona li pona. ni li lon.
mi toki e ni: “a a a!” mi lukin anu kute e ijo. mi toki insa e ni: “tenpo pini lili la mi sona+ala e ni: ijo+ni li kama. ken la ona li ike tawa jan. a! ona li ike ala tawa mi. mi pilin+pona tan ona.”zz uta mi li kalama.
akesi
akesi li sama soweli, taso akesi li lete li jo ala e linja sama soweli.
akesi li sama soweli, taso akesi li ken lon telo lon tenpo suli.
akesi li sama soweli, taso akesi li ike lukin.
ala
ijo+ala li lon. ijo+ale li lon ala.
ona li moku ala moku? ona li moku anu seme?
alasa
mi alasa e ona. mi kama sona e ni: ona li lon seme? mi tawa ona. ken la mi utala e ona.
mi alasa e ijo+mute. ijo+mute li lon ma ante mute. mi pana e ijo+ni ale tawa ma wan.
mi alasa moli e ona. mi lukin moli e ona.
ale
ijo+ale li lon. ijo+ala li lon ala.
ale li pona. lon li pona.
ale li pona. ma ale en ijo+ale li pona.
ona ale li pona. wan ale ona li pona.
ale li nanpa mute mute mute mute mute.
anpa
mi lon anpa ona. ona li lon sewi mi.
mi anpa. mi tawa anpa.
anpa li supa suli lon tomo. ijo li lon insa tomo la ona li lon ijo+ante ala la ona li lon anpa.
ante
ona li ante. ona li sama ala.

anu
mi anu sina li moku. mi moku ala la sina moku.
mi moku. anu la sina moli. mi moku ala la sina moli.
awen
ijo+awen li ante ala lon tenpo suli.
ijo+awen li tawa ala lon tenpo suli.
mi awen moku. mi pini ala moku.
e
mi moli e ona. mi tan e moli ona.
mi pona e ona. mi tan e ni: ona li kama pona.
mi moku e kili e pan. mi moku e kili. mi moku e pan.
en
mi en sina li moku. mi moku. sina moku.

esun
mi esun e ona. mi jo e ona. taso mi wile e ijo pi jan+ante. ni la mi toki tawa jan ni li toki e ni: “mi pana e ona tawa sina la o pana e ijo+ni tawa mi.”
mi esun e ona. jan+ante li jo e ona li toki e ni: “sina pana e mani tawa mi la mi pana e ona tawa sina.”zz ni la mi pana e mani tawa jan ni. tan ni la jan ni li pana e ona tawa mi.
esun li kulupu jan li pali li esun.
esun li tomo. jan li esun lon esun.
ijo
jan en soweli en kasi en kiwen en pali li ijo.

ike
ike li pona ala.
pali ni li ike. mi pali suli ala la mi ken ala pali e pali ni.
ona li ike. ona li jo e wan mute mute. jan li kama sona e ona lon tenpo lili taso la jan ni li sona+ala e ona.
ilo
jan li kepeken ilo.
jan li ken moku kepeken ilo moku. jan+mute li wile moku kepeken ilo moku. tan ni la jan li pali e ilo moku mute.
insa
mi lon insa pi ijo+tu. ijo+ni wan li lon poka mi. ijo+ni ante li lon poka ante mi.
mi tawa insa tomo. tenpo pini la mi lon insa tomo ala. taso mi tawa. ni la mi lon insa tomo.
insa li wan insa sijelo.
jaki
ijo+lili mute li lon selo pi ijo+jaki. mi wile weka e ijo+lili ale tan selo ona.

jan
jan li sama soweli, taso jan li ken toki+pona.

jelo
insa pi sike mama li jelo.

jo
mi jo e ona. mi pilin e ona. ni la ona li lon poka mi. ni la mi ken tawa e ona.

kala
kala li sama soweli, taso kala li lon telo li lete li jo e noka ala.

kalama
jan li ken kute e kalama. taso jan+ala li ken lukin e kalama. kalama li tawa kepeken kon.
mi weka tan kalama suli la mi ken kute e kalama suli.
mi kalama. mi pali e kalama.
kama
sina kama tawa ona. mi en ona li lon ma ni. sina tawa ma ni.
ona li kama tawa mi. jan anu ijo li pali e ona tawa mi.
moli mi li kama. mi moli.
mi kama suli. tenpo pini la mi suli ala. taso ijo li kama. ni la mi suli.
mi kama e ona. mi tan e ona.
mi moku la tenpo kama la sina toki. sina toki la tenpo pini la mi moku.
tenpo kama la mi moli.
tenpo pini la mi sona+ala e ona. tenpo ni la mi kama sona e ona. tenpo kama la mi sona e ona.
kasi
kasi li jo ala e suno e telo la kasi li moli.
jan li tu e kasi li pali e tomo kepeken ona.
kasi li wan kasi.
ken
mi ken pali. mi lukin pali la mi pali.
ken la ona li lon. ijo+sama ona li ken lon. mi sona+ala e ni: ona li lon ala lon?
mi ken e ona. mi tan ala e ni: ona li kama ala. ni la ona li ken kama.
ijo+ken li ken kama.
kepeken
mi utala e ona kepeken ilo. mi lawa e ilo. tan ni la ilo li tawa li utala e ona.
mi kepeken ona. mi pali kepeken ona.
kili
kili li moku kasi.
kili li moku kasi suwi li jo e pan.
kin
ona kin li lon. ona li ijo+sin sama ni li lon.

kiwen
kon en telo en kiwen li ante. ijo li kiwen la ona li kon ala li telo ala.
jan li pali e ilo moku e ilo pakala e ilo utala kepeken kiwen.
ko
jan li weka e ko tan ma li pali e poki kepeken ko. ko en telo li wan la ona li kiwen ala. ko li seli la ona li kama kiwen.

kon
jan+ala li ken lukin e kon. taso kon li tawa la jan li ken pilin e ona.
ijo+kon li sama kon.
jan li ken pilin kon kepeken nena ona.
mi kon. mi pana e kon.
mi tawa kon. mi tawa lon kon lon tenpo suli. mi pilin e kon, taso mi pilin+ala e ma kiwen.
kon li wan jan li pilin. jan+mute li pilin e ni: sijelo jan li moli la kon ona li awen lon li awen pilin.
kule
pimeja en walo en laso en jelo en loje li kule.

kulupu
ijo+mute li sama wan la ona li kulupu.
kulupu li kulupu jan.
kute
mi ken kute e kalama e toki kepeken kute mi.

la
tenpo ni la mi moku. mi moku lon tenpo ni.
tan ni la mi moku. mi moku tan ni.
mi moku ala la mi moli. ken la mi moku ala. tan ni la mi moli.
ni la mi moku. tan ni la mi moku.
mi la ona li pona. tawa mi la ona li pona.
pipi ante la pipi ni li suli. pipi ni li suli mute. pipi ante li suli lili.
lape
mi lape. tenpo suli la mi awen li tawa ala li lukin ala li pilin+ala li toki+ala. tenpo mute la jan+ale li lape. tenpo pimeja la jan+mute li lape.
mi lape. mi tawa lili taso lon tenpo.
laso
tenpo suno la sewi li laso.
kasi mute li laso.
lawa
mi lawa e ona. mi tan e ni: ona li pali.
uta mi en lukin mi li lon lawa mi.
lawa jan li wan sijelo li pilin li toki insa.
jan+lawa li toki e ijo+sama ni: “jan+ale li ken pali e ijo+ni li ken ala pali e ijo+ante. mi pali e ike tawa jan+ike. mi pana e pona tawa jan+pona.”
ijo+lawa li suli mute li ken pali e ijo+mute.
len
mi len e ona kepeken ijo. mi pana e ijo+ni lon poka ale ona.
jan li pali e len kepeken linja mute. jan li ken len e sijelo kepeken len. sijelo li lon insa len la ona li seli.
lete
lete li lon la telo li kama kiwen.
ijo+lete li seli ala.
li
ona li moku li moli. ona li moku. ona li moli.

lili
ijo+lili li suli ala.
ijo+lili li ijo pi mute ala.
tenpo pini suli la jan+lili li lon ala. taso tenpo pini lili la mama ona li lon e ona.
linja
linja mute li lon selo soweli li lon lawa jan+mute.
jan li pali e linja kepeken nasin ni: ona li kama jo e linja mute li tawa e kulupu linja sama ni: pini wan taso pi kulupu linja li sike.
mi jo e pini linja wan la sina jo e pini linja ante la mi tawa weka tan sina la mi ken ala tawa weka e pini linja mi la linja ni li lukin sama ijo+linja.
lipu
wan ale pi selo sinpin lipu li lon poka pi selo monsi lipu. jan li pali e lipu kepeken nasin ni: ona li wan e wan kasi lili mute e telo seli.
lipu li jo e lipu mute e nimi mute.
loje
jan li tu e sijelo la telo sijelo loje li tawa weka tan sijelo.

lon
mi lon ma ni. mi pilin e ma ni.
mi lon ni. mi lon ma ni.
jan li toki e ni: “soweli li lon ni.” jan li lon ma li toki. toki ona la soweli li lon ma sama.
ona li lon. ona li lon ma.
mi lon e ona. mi tan e ni: ona li lon.
luka
luka jan li wan sijelo. jan li ken jo kepeken luka ona.
luka li nanpa tu+tu wan.
palisa luka li lon luka.
mi luka e ona. mi pilin e ona kepeken luka mi.
lukin
jan li ken lukin e kule. taso jan+ala li ken kute e kule.
lukin jan li wan sijelo. jan li ken lukin tan lukin ona.
mi lukin moli e ona. mi wile e ni: ona li moli. mi toki insa e ni: “ken la mi pali e ijo la ona li moli.”zz tan ni la mi pali e ijo+ni.
lupa
lupa ona li lon insa ona. taso wan ona ala li lon insa lupa. ijo+ante li ken tawa insa lupa.
lupa li lupa lon sinpin tomo.
ma
jan+ale li lon ma. kasi mute li kama suli lon insa ma.
tomo li lon ma, taso ma li lon insa tomo ala.
jan+lawa li lawa e ma.
mama
jan tu li lon e jan+lili la ona li mama pi jan+lili ni.
mama pi mama mi li mama mi.
mama mi en jan+sama mi li kulupu mama mi.
sike mama li kama suli lon insa pi sijelo waso li tawa weka tan waso mama li kama e waso lili.
jan meli mute en soweli meli mute li pali e telo mama lon insa pi sijelo ona. jan+lili mute en soweli lili mute li moku e telo mama taso.
mani
tenpo mute la jan li esun kepeken mani. jan+mute li wile e mani.
mani li soweli suli. jan+mute li moku e sijelo mani e telo mama mani. jan li awen e mani mute tan ni.
meli
meli li sama ni: tenpo mute la meli li lon e jan+lili la jan+lili li lon insa pi sijelo ona.

mi
jan li toki e ni: “mi moku.” jan li toki. toki ona la ona li moku.

mije
mije li meli ala.

moku
mi moku e kili. mi tawa e kili lon insa mi.
jan li moku e moku.
moli
mi moli. mi pini lon.

monsi
ona li jo e pini tu la pini wan li sinpin ona la pini ante li monsi ona.
monsi jan li wan sijelo lon sewi noka.
mu
soweli li toki e mu taso.

mun
tenpo pimeja la jan li ken lukin e mun lon sewi.

musi
mi musi. mi pali e pona tawa mi.
jan li pali e kalama+musi tan ni: jan li wile kute e ona.
jan li pali e musi. musi li pona lukin.
mute
wan li mute ala. tu li mute ala. tu+wan li mute. tu+tu li mute. tu+tu wan li mute…
sina lukin e jan pi mute seme? sina lukin e jan wan anu jan tu anu jan tu+wan…?
mute li nanpa luka+luka luka+luka.
namako
jan li pana e telo tan telo suli tawa poki li seli e poki. tenpo kama la poki li jo e telo ala e namako walo.

nanpa
ala en wan en tu li nanpa. ken la luka en mute en ale li nanpa.
tenpo pini la ijo+nanpa wan li kama. tenpo ni la ijo+nanpa tu li kama. tenpo kama la ijo+nanpa tu+wan li kama.
nasa
jan+nasa li toki insa e ni: “ijo li lon.”zz jan+mute li sona e ni: ijo+ni li lon ala. tan ni la ken la jan+nasa li pali e ike.
jan+nasa li lukin tan e ni: jan+ante li toki e ni: “a a a!”
jan+nasa li ken ala kama sona e ijo+mute.
jan li pakala e kili li pana e telo suwi tawa poki. tenpo kama suli la telo ni li kama telo nasa. jan li moku e telo nasa la ona li kama nasa.
nasin
sina pali e ona kepeken nasin seme? sina pali e ijo+mute. tan ni la ona li kama. ijo+mute ni li seme?
kulupu jan li pilin e ijo+sama li pali e ijo+sama la ijo+ni li nasin pi kulupu ni.
jan li ken tawa ma wan tan ma ante lon nasin.
nena
nena jan li lon sinpin ona lon sewi uta. jan li ken kon kepeken nena ona.
nena li ma. ma ante li lon poka nena la selo ona li lon anpa pi selo nena.
ni
mi pilin e ijo. mi pilin+ala e ijo+ante. mi pilin e ijo+ni.

nimi
jan li toki e nimi mute.

noka
noka jan li wan sijelo. jan li ken tawa ma ante kepeken noka ona.

o
sina o moku! mi wile e ni: sina moku.
o moku! sina o moku!
sina o! sina o kute e mi!
oko
oko mi li lukin mi.

olin
mi olin e ona. mi wile lon poka ona lon tenpo suli. mi lukin e ona la ni li pona tawa mi. mi wile e ni: ona li pilin+pona.

ona
ona li pali. ijo+ni anu jan ni li pali.

open
mi open pali e ona. tenpo pini lili la mi pali ala e ona. taso mi pali e ona lon tenpo ni lon tenpo kama.
mi open e ona. mi tawa e wan ona. tan ni la ijo+ante li ken tawa insa ona.
mi open e ilo. mi tan e ni: ilo li open pali.
tenpo suno open la jan li ken lukin e suno lon sewi. taso tenpo pini lili la ona li ken ala lukin e suno lon sewi.
pakala
mi pakala e ona. mi pali e ike tawa ona. ni la ona li kama ike. ken la ona li ken ala pali lon tenpo ni.
mi kama e pakala. mi kama e ike, taso mi lukin ala kama e ona.
pali
mi pali e ilo. mi pali kepeken ijo+mute. tan ni la ijo+ni li kama wan li kama ilo.

pan
pan li kiwen+lili li kama suli lon insa kili. tenpo kama la pan li lon insa ma la ona li lon e kasi kili.
jan li pali e pan kepeken nasin ni: pan en telo li kama wan li seli li kama kiwen. jan+mute li moku e pan.
pana
mi pana e ona lon ni. tenpo pini la ona li lon ni ala. taso mi tawa e ona. ni la ona li lon ni.
mi pana e ona tawa jan. mi tan e ni: jan li jo e ona.
mi pana e ona tawa ma ante. mi tawa ma ante e ona, taso mi tawa ma ante ala.
mi pana e telo lukin. telo li tawa weka tan lukin mi.
mi pana e kon. mi tawa insa sijelo e kon. mi tawa weka e kon.
pi
mi moku kepeken uta mi. jan+ante li moku kepeken uta pi jan+ante.

pilin
jan li pali e ike tawa mi la mi pilin+ike. jan li pana e pona tawa mi la mi pilin+pona.
pilin jan li wan sijelo li tawa insa sijelo e telo sijelo loje.
mi pilin e ona. mi toki insa e ona.
pimeja
tenpo pimeja la suno li lon ala.
ijo+pimeja li lukin sama sewi lon tenpo pimeja.
suno ala li lon la mi lukin e pimeja taso.
pini
pini palisa li wan palisa. palisa li jo e pini tu taso. pini wan li weka tan pini ante.
mi pini moku. tenpo pini lili la mi moku. taso tenpo ni la mi moku ala.
mi pini e ona. mi tawa e wan ona. tan ni la ijo+ante li ken ala tawa insa ona.
mi pini e ilo. mi tan e ni: ilo li pini pali.
sina toki la tenpo pini la mi moku. mi moku la tenpo kama la sina toki.
tenpo pini la mama mi li lon e mi.
pipi
pipi li sama soweli, taso pipi li lili mute li jo e selo kiwen e noka mute.

poka
mi lon poka ona. mi weka ala tan ona.
mi pali e ona poka sina. mi pali e ona lon poka sina. mi en sina li pali e ona.
poki
poki li ilo. jan li pali e poki tan ni: ijo+ante li ken lon insa poki. jan li wile e ni.
jan li pana e telo lon insa poki li moku e telo ni.
pona
ona li pona. ona li ike ala.
ijo li pona tawa mi la mi wile e ona.
pu
mi pu. mi kepeken lipu pi toki+pona.

sama
ona li lukin sama pipi. mi lukin e ni li toki insa e ni: “ona li sama pipi.”
mi en sina li sama. mi sama sina. sina sama mi.
mama mi li sama mama pi jan+sama mi.
sina lukin e luka sama. sina lukin e luka sina.
seli
seli li lon la telo li kama kon.
ijo+seli li pilin+sama seli.
seli li seli mute li suno.
selo
selo jan li wan sijelo. ijo+ante li ken pilin e selo li ken ala pilin e wan insa sijelo.
ona li lon selo mi. ona li pilin e selo mi.
seme
mi toki e ni: “seme li lon?”zz sina toki e ni: “ala li lon.”
ona li moku anu seme? ken la ona li moku. ni li lon la mi wile sona e ni.
sina moku tan seme? ijo li tan e moku sina li seme?
sina pali kepeken nasin seme? sina pali kepeken nasin. nasin ni li seme?
sewi
mi lon sewi ona. ona li lon anpa mi.
mi sewi. mi tawa sewi.
sewi ona li wan ona li lon sewi pi wan ante ona.
sewi li ma suli lon sewi pi ma jan.
jan+mute li pilin e ni: sewi li lon li pona li sama jan li jo ala e sijelo li moli ala li lon e ale.
sijelo
wan mi li ken pilin e ijo+ante. wan ante li lon insa mi. sijelo mi li wan ni ale.

sike
nena ala li lon selo sike. insa sike li weka sama tan wan ale pi selo sike.
mi sike e ona. mi tawa sinpin ona. mi tawa poka ona wan. mi tawa monsi ona. mi tawa poka ona ante. mi tawa sinpin ona.
ona li sike. poka ona li sike e insa ona.
sin
ijo+sin li lon ni. tenpo pini lili la ijo li lon ni. taso tenpo ni la ijo+ni en ijo+ante li lon ni.
ona li sin. tenpo pini lili la ijo li lon e ona.
sina
jan li toki e ni tawa soweli: “sina moku.” jan li toki. toki ona la soweli moku.

sinpin
tenpo mute la jan li kepeken ijo la sinpin ona li lon poka pi jan ni.
tenpo mute la ijo li tawa mi la mi ken lukin e sinpin ona taso.
sinpin jan li sinpin pi lawa ona.
sinpin li sama supa, taso sinpin li len e poka ale tomo.
sitelen
mi sitelen e pipi. mi pilin e lipu kepeken ilo. tan ni la wan pi selo lipu li kule ante. ni la lipu ni li lukin sama pipi li sitelen pipi.
mi sitelen e nimi. mi sitelen. jan+ante li lukin e sitelen ni la ona li toki insa e nimi ni.
sona
mi sona e nimi. jan li toki e nimi tawa mi la ona li wile e ni: mi pilin e ijo. mi sona e ijo+ni.
mi sona pali e ona. mi sona e ni: mi ken pali e ona kepeken nasin seme?
mi pana e sona tawa sina. mi tan e ni: sina kama sona.
jan+sona li sona e ijo+mute.
mi sona e ona. tenpo pini la mi lukin e ona li pali lon poka ona.
soweli
soweli li ken pilin li ken wile li ken tawa ma ante.
linja mute li lon selo soweli. mama meli soweli li pana e telo mama.
suli
sinpin pi ijo+suli li weka tan monsi ona.
ona li suli. mi pali lili taso la mi ken ala tawa e ona. taso mi pali mute la ken la mi ken tawa e ona. tawa pi ijo+suli li pali ike.
ona li suli. ona li ken kama e wile mi.
tenpo pini la jan+suli li jan+lili. taso ona li kama suli. ni la ona li suli.
suno
suno li lon ala la jan li ken ala lukin.
suno li ijo+suli seli lon sewi.
supa
wan pi telo suli li pilin e kon. supa li lukin sama wan ni.

suwi
moku suwi li pona tawa uta.
kon suwi li pona tawa nena.
tan
mi moli tan ni: mi moku ala. mi moku ala la mi moli. mi moku ala. mi moli.
mi tan e ona. mi pali. ona li kama tan ni.
mi tawa ma ni tan ma ante. tenpo pini la mi lon ma ante. taso mi tawa. ni la mi lon ma ni.
taso
ijo+nanpa wan li lon, taso ijo+nanpa tu li lon ala. mi toki e ni: “ijo+nanpa wan li lon.”zz ken la sina li kute e ni la sina li pilin e ni: “ijo+nanpa tu li lon.”zz mi wile e ni: sina sona e ni: ijo+nanpa tu li lon ala. ni la mi toki e ni: “taso ijo+nanpa tu li lon ala.”
mi jo e ona taso. mi jo e ona e ijo+ante ala.
tawa
mi tawa ona. tenpo pini la mi weka tan ona. taso mi tawa. ni la mi lon poka ona.
mi tawa e ona. mi tan e ni: ona li tawa.
ona li pona tawa mi. mi pilin e ni: ona li pona.
mi tawa anpa. tenpo pini la mi lon ma. taso mi tawa. ni la mi lon anpa pi ma ni.
mi tawa sewi. tenpo pini la mi lon ma. taso mi tawa. ni la mi lon sewi pi ma ni.
telo
jan li ken lukin e telo mute lon ma. jan li lon insa telo la telo li ken pilin e selo ona ale.
telo li lon insa poki la lupa lili li lon anpa poki la telo li tawa anpa li tawa weka tan poki.
tenpo
jan li toki e ni: “tenpo ni la soweli li moku.” tenpo la jan li toki. toki ona la soweli li moku lon tenpo sama.
tenpo suno la suno li lon. tenpo pimeja la suno li lon ala.
toki
jan+mute li toki kepeken uta ona.
sina lukin e nimi mi. mi sitelen e nimi ni kepeken toki+pona.
toki! mi lon. mi ken kute e sina. mi wile toki tawa sina.
mi toki insa e ona. mi taso li kute e ni: mi toki e ona. taso mi toki uta ala.
tomo
jan li ken lon insa tomo. jan li pali e tomo tan ni.
tomo li wan tomo. sinpin li lon insa pi tomo tu.
tu
wan en wan li tu.
mi tu e ona. mi tan e ni: ona li kama tu. ni la mi ken weka e wan ona tan wan ante ona.
unpa
tenpo mute la meli wan en mije wan li ken lon e jan+lili kepeken unpa.

uta
uta jan li wan sijelo. jan li ken moku li ken toki kepeken uta ona.

utala
mi utala e ona. mi tawa wawa e kiwen tawa ona. kiwen tawa li pilin wawa e ona. ken la mi pakala e ona tan ni.
mi utala e ona. ona li pali lili. mi lukin pali mute.
mi toki utala tawa sina. mi lukin lawa e sina kepeken toki. ken la mi tu li pilin+ike tan ni.
jan+utala li moli e jan+ike.
walo
telo mama li walo.

wan
jan wan li lon ni. jan ni taso li lon ni.
mi wan. mi taso li lon ni.
waso
waso li sama soweli, taso waso li jo ala e linja sama soweli li jo e linja lipu e noka tu taso. waso mute li ken tawa kon lon tenpo suli kepeken tawa wawa pi linja lipu ona.

wawa
jan+wawa li ken tawa e ijo+suli.
jan li ken ala lukin e wawa, taso wawa li kon ala. wawa li ken tawa insa pi linja kiwen. wawa li ken lon e seli e tawa e suno. ilo mute li kepeken wawa.
weka
mi weka tan ona. mi lon poka ona ala.
mi tawa weka tan ona. tenpo pini la mi lon poka ona. taso mi tawa. ni la mi weka tan ona.
mi weka e ona. mi tan e ni: ona li tawa weka.
ijo+weka li lon ni ala.
wile
mi wile e ni: sina moku e ona. sina moku e ona la ni li pona tawa mi. ni la ken la tenpo kama la mi lukin kama e ni.
mi wile e ni: sina moku e ona. sina moku ala e ona la ni li ike tawa mi.
mi wile moku e ona. mi wile e ni: mi moku e ona.
mi wile e ona. mi wile jo e ona.